¿Como prenzipiar?

Toz podemos escomenzar mui fázilmen á fer o nuestro árbol chenealochico. O primer trango ye reyalizar una rechira familiar: preguntando a os nuestros familiars de mayor edat por os nombres, calendatas relebans, istorias, etz. relatibas á nuestros debanpasaus u rebuscallando entre os decumentos que puedan conserbar-se en a nuestra familia. Astí podemos trobar una informazión unica que nos aduyará á construyir a nuestra istoria familiar.

Una begada reyalizau iste trango abremos de recorrir á atras fuens decumentals. Ta os primers trangos ye á saber qué útil o Rechistro Zebil. Solizitando zertificaus de naximiento, una chenerazión dezaga de l’atra, ye posible plegar dica 1870, que ye cuan s’establió en España o Rechistro Zebil.

Os archibos parroquials, y en particular, os libros de baltizaus, matrimonios y defunzions, son instrumentos alazetals ta lebar a imbestigazión dillá d’ixas calendatas. Con a informazión almagazenada en ellos ye posible plegar dica o sieglo XVI.

Son muitos os tipos de decumentos que nos pueden premitir enamplar a informazión sobre os nuestros debanpasaus: padrons, zensos eleutorals, protocolos notarials (capitulazions matrimonials, desposizions testamentarias), pleitos, prozesos d’infanzonía, autas de conzellos, listas d’embarque d’emigrans, y muitos atros que podemos trobar en archibos publicos y pribaus.