Istoria

Yera á prenzipios de l’año 2004 (en Internet fa cuasi una eternidat) cuan una colla de presonas intresadas en a Chenealochía y, espezialmén, en l’estudeo d’as suyas radizes en a comunidat aragonesa, creyó un for en Yahoo con a intenzión de meter en común aduyar-sen en as suyas rechiras.

A colla AragónGen de chenealochía aragonesa eba prenzipiau a suya cursa.

Mientras istos más de 3 años, a colla ye estada muito autiba: cuasi 8500 mensaches dica güe (fin de febrero de 2007) y 539 miembros abalan ista autibidat.

En chunio de 2005, se plantea a zelebrazión d’una primer reunión de miembros d’a colla. Ista estió zelebrada o sabado 25 de chunio de 2005 en Zaragoza con una asistenzia importán y con gran partizipazión e ilusión. Estió alabez cuando se proposa que a colla esdebienga en una Asoziazión Cultural, no tanto como sostituzión d’a propia colla, sino como una traza de afundir y canalizar ixas ansias y conoximientos que beluns mostraban.

Á la fin d’ixa añada, 2005, bels cuantos encheguemos l’Asoziazión. O camín yera difízil ya que AragónGen naxió y contina treballando cuasi de raso d’una traza no presenzial. Y ye que, cheograficamén somos repartius cuasi por toz os continens y, amás d’ixo, naixiemos d’Internet, meyo un tanto inusual ta fer marchar una asoziazión.

Mientras l’año 2006 enzetemos as autibidaz de l’Asoziazión. O primer yera constituyir-se: un estatuto y unos cargos eleutos. En febrero os sozios fundadors siñemos as Ordinazions, con a primer chunta constituyén: Jesús Soriano, presidén; Manuel Trujillo, bezipresidén; Juan Pablo Martínez, secretaire; y Gonzalo Vázquez, tresorero.

O 9 d’abiento de 2006 se fazió en Zaragoza a primer Asambleya Cheneral de l’Asoziazión. Dimpués d’os primers trangos, en a reunión s’establió más claramén a organizazión y modelo de funzionamiento de l’Asoziazión. Tamién s’emologoron cambeos parzials en as ordinazions y s’eslixió a primer Chunta Direutiva no constituyén.

O 2007 quiere estar l’añada de l’asolamiento y d’a espardidura d’as nuestras autibidaz. En ixo i somos treballando y con ista ilusión os reculliremos con os brazos ubiertos patalers.